حلطمة بسيطة إلى شعبي الكريم اللي يتذمرون من زحمة السيارات والحوادث والمصايب في السعودية، اللي لما نزل فيديو “إرهاب الشوارع” حبّوا العمل وتفاعلوا معه وأنا أولهم :
ولكن لما دُشن نظام “ساهر” وجاء الحل الإيجابي للمشكلة؛ زعلوا الناس وبدوا يصيدون راداراته وكاميراته وأبثرونا بإيميلاتهم تقل الواحد قاعد يخدم الناس إذا حصل رادار !
يا شعبي المحترم ليش ما تحب تسوق تحت الأنظمة لسلامتك وسلامة الناس حولك؟
ليش أنت مزاجي تبي تسوي اللي تبي والأنظمة تشوفها من منظور إنها ربح مادي للدولة وبس؟
تبون نسوي مقارنة بسيطة؟
أحد أصدقائي البارح وحنا نتمشى في أحد ضواحي لوس أنجلس أخذ مخالفة وهو يمشي على رجوله لأنه قطع شارع -لا يكاد يكون رئيسي- و علامة المشاة كانت حمراء مع إنه ما كان فيه سيارات تمر أصلاً !
تخيلوا مخالفة وهو يمشي على رجوله!!
المنطق التالي اللي يمشي عليه شعبي اللطيف:
“أبخالف وأبحط حياتي وحياة اللي حولي بخطر ويا ويلكم تصيدوني وتعطوني مخالفة”
إسمحولي ما يخش الراس .
صدقوني بالمرتبة الأولى هي مسألة احترام لحياة الناس.
الله يحفظكم ويرفع شانكم، بس لو الواحد يفكر لمدة دقيقة وحدة ويكتب لستة بإيجابيات نظام “ساهر” وسلبياته ويتوصل بنفسه لنتيجة مدى جدوى مثل هالأنظمة، بدل ما يردد اللي يقوله الفئة السلبية من الناس اللي للأسف لسه تفكر بنفس النمطية الغير مجدية للمصلحة العامة.
مع تحيات مواطن مغلوب مثله مثل أي مواطن مغلوب ثاني~
