حلطمة بسيطة إلى شعبي الكريم اللي يتذمرون من زحمة السيارات والحوادث والمصايب في السعودية، اللي لما نزل فيديو “إرهاب الشوارع” حبّوا العمل وتفاعلوا معه وأنا أولهم :

ولكن لما دُشن نظام “ساهر” وجاء الحل الإيجابي للمشكلة؛ زعلوا الناس وبدوا يصيدون راداراته وكاميراته وأبثرونا بإيميلاتهم تقل الواحد قاعد يخدم الناس إذا حصل رادار !
يا شعبي المحترم ليش ما تحب تسوق تحت الأنظمة لسلامتك وسلامة الناس حولك؟
ليش أنت مزاجي تبي تسوي اللي تبي والأنظمة تشوفها من منظور إنها ربح مادي للدولة وبس؟

تبون نسوي مقارنة بسيطة؟
أحد أصدقائي البارح وحنا نتمشى في أحد ضواحي لوس أنجلس أخذ مخالفة وهو يمشي على رجوله لأنه قطع شارع -لا يكاد يكون رئيسي- و علامة المشاة كانت حمراء مع إنه ما كان فيه سيارات تمر أصلاً !
تخيلوا مخالفة وهو يمشي على رجوله!!

المنطق التالي اللي يمشي عليه شعبي اللطيف:
“أبخالف وأبحط حياتي وحياة اللي حولي بخطر ويا ويلكم تصيدوني وتعطوني مخالفة”
إسمحولي ما يخش الراس .

صدقوني بالمرتبة الأولى هي مسألة احترام لحياة الناس.

الله يحفظكم ويرفع شانكم، بس لو الواحد يفكر لمدة دقيقة وحدة ويكتب لستة بإيجابيات نظام “ساهر” وسلبياته ويتوصل بنفسه لنتيجة مدى جدوى مثل هالأنظمة، بدل ما يردد اللي يقوله الفئة السلبية من الناس اللي للأسف لسه تفكر بنفس النمطية الغير مجدية للمصلحة العامة.

مع تحيات مواطن مغلوب مثله مثل أي مواطن مغلوب ثاني~

السلام عليكم ورحمة الله ..

صباح/ مساء الخيرات

في السنة الثانية من دراستي بالجامعة وفي بداية الفصل الثاني تحديداً
دخل علينا الدكتور ..
وبعد ما أخذ أسماء الحضور، عدّل شخصيته وهو واقف وقال: أبي كل واحد منكم يتخيل نفسه دخل دائرة حكومية يبي يخلص معاملة،
وشاف طابور على شباك الموظف وفيه ناس متزاحمين مطنشين الطابور ..
هل تصف طابور و ربما تتأخر ؟ .. أو تزاحم المتزاحمين وتحاول تخلص بسرعة ؟!

الدكتور ما انتظر من الطلاب جواب .. هو جاوب بالنيابة وقال:
أكيد إن كل واحد يبي يشوف إنه ما فيه فايدة من الطابور والمنطقي إنه يروح يزاحم عند الشباك !

أنا رفعت يدي وعطاني الإذن، قلت: يا دكتور بالنسبة لي راح أصف طابور

استغرب من جوابي وشوي من جرأتي … قال ليه أنت خبل ؟ – أو كلمة قريبة منها-
قلت: لأ يا دكتور !
قال وهو يبتسم باستغراب: أجل ما راح تخلص !!
رديت: إسمح لي أحلل الموقف

أنا أمام خيارين؛ الأول إني أصف طابور وأحترم الناس اللي جت قبلي وهو الفعل الصح،
والثاني إني أروح أزاحم وأدّعي إني ذكي وهو التصرف الخطأ ..

بالحالة هذي أنا راح أتصرف التصرف الصح بغض النظر عن أي شيء ثاني .

اندهش الدكتور ونظرات الطلاب كأنها تقول لي بلا فلسفة !!
رد الدكتور بإنه طرح هالسؤال نفسه في أمكان كثيرة وتناقش فيه مع ناس كثير، واستغرب من اثنين جاوبوا نفس إجابتني بإنهم راح يصفون طابور، وهذا يخليني الثالث !

يقول: أتمنى إني أقتنع بإن الفعل الصح هو إني أصف طابور، مع إني متيقن من إن الموظف اللي على الشباك ما يعير أي اهتمام !

//

هذا فلاش يقارن الشعب الإيطالي بالشعوب الأوربية الثانية
ويوريك كيف إن الإيطاليين فوضويين ..

http://www.infonegocio.com/xeron/bruno/italy.html

الفلاش قديم شوي بس ممتع صراحة
وكل المشاهد الرمزية اللي فيه مطابقة للشي اللي نعيشه بالسعودية وهو الشي اللي حاب أقوله ..
واللي بالأصل هي فكرة تكونت عندي من فترة، وأعتقد بواقعيتها لحد كبير :

إن كل شعب مهما تطور في أسلوب معيشته وحياته؛ إلا إنه يفضل أن يدقق بعيوبه أكثر من أن يقتنع بتطوره
ومهما شاف غيره أقل منه إلا إنه يصرّ على إنه وصل لحد سيء جداً من الفوضى، وإن المستوى اللي وصل له ما يعتبره كافي لأن يهدي أعصابه ويقنع فيه .

أحب أقول .. إن اللي صنع هالفلاش ربما هو واحد من الإيطاليين .. واللي تفرجوه ملايين من الإيطاليين أنفسهم اللي يقرّون بهالشي
ولو إنهم دولة أوربية لكن مع ذلك يستسلمون للفكرة هذي !

حنا بالسعودية وش عسانا نقول !!
نشوف هالشي ونعيشه من صغرنا، ولو سألنا كل واحد على حدة عن رايه بالفوضى راح يجاوب باستيائه منها ..

//

منذ فترة قررت أن أرفع شعار “إفعل الشيء الصحيح”
… هناك شعور بالبياض ستشعر به حينها